Нова надеж за прекин на огнот – Саливан: САД, Египет, Катар и Израел постигнаа разбирање за контурите на договорот
САД, Египет, Катар и Израел постигнаа разбирање за „основните контури“ на договор за ослободување заложници за привремен прекин на огнот во Газа, изјави денеска за Си-Ен-Ен американскиот советник за национална безбедност Џејк Саливан.
Договорот се уште се преговара, рече Саливан, пренесе Ројтерс.
Тој додаде дека Катар и Египет ќе мора индиректно да разговараат со Хамас.
Израелскиот премиер Бенјамин Нетанјаху денеска изјави дека се уште не е јасно дали договорот за заложниците ќе се оствари врз основа на тековните преговори.
Нетанјаху, во интервју за Си-Би-Ес Њуз, додаде дека подоцна денеска ќе се состане со персоналот за да разговара за двоен воен план кој вклучува евакуација на палестинските цивили во Газа и операција за уништување на преостанатите баталјони на Хамас, објави Ројтерс.
– Ако постигнеме договор, работата малку ќе се одложи, но тоа ќе се случи. Ако нема договор, сепак ќе го направиме – изјави тој за CBS News.
Во првото затишје во борбите, во ноември, околу половина од 253-те луѓе заробени од Хамас за време на нападот на 7 октомври беа ослободени. Во тој договор, Израел ослободи три пати повеќе Палестинци од своите безбедносни затвори и доби повеќе хуманитарна помош за Газа.
Израелските медиуми, повикувајќи се на неименувани официјални лица, објавија дека постои рамка за враќање на околу една третина од 130-те преостанати заложници за време на шестнеделното примирје што го покрива светиот муслимански месец Рамазан (во март/април). Немаше официјална потврда од ниту една страна.
