Нова карта на светот по Трамп: Гугл се согласи да го преименува Мексиканскиот залив!
Откако Доналд Трамп потпиша извршна наредба за преименување на Мексиканскиот Залив во Американски Залив, како и Денали во планината Мекинли, Google потврди дека ќе се усогласи со оваа директива и ќе ги промени имињата на овие локации во својата апликација Google Maps.
Иако наредбата на Трамп го менува официјалниот став на американската влада за имињата на Мексиканскиот залив и планината Денали, таа директно не ги обврзува компаниите да се прилагодат на овие промени.
Сепак, Google во понеделникот на социјалната мрежа X потврди дека ќе ги спроведе промените, повикувајќи се на својата долгогодишна практика да следи официјални владини извори при именување локации.
Досега, Географскиот информациски систем (GNIS), кој е официјален извор на американската влада за имињата на географските локации, сè уште не ги ажурирал своите податоци во согласност со наредбата на Трамп. Сепак, претседателот даде рок од 30 дена да се завршат овие измени.
Промена на глобално ниво
Google потврди дека промените на името во апликацијата Google Maps нема да бидат видливи само за корисниците од САД, туку за сите кои ја користат апликацијата ширум светот. Ова е особено интересно кога станува збор за Мексиканскиот залив, бидејќи е опкружен не само со Америка, туку и со Мексико и Куба.
Две имиња за една локација
Кога станува збор за планината Денали, која се наоѓа исклучиво во границите на САД, се очекува нејзиното име да биде сменето во планината Мекинли на глобално ниво. Сепак, ситуацијата со Мексиканскиот Залив е посложена – додека американските корисници ќе го видат името „US Gulf“, меѓународните корисници веројатно ќе ги видат двете имиња истовремено.
