Нов земјотрес во Турција со јачина од 5,2 степени
Земјотрес со јачина од 5,2 степени според Рихтеровата скала ја погоди провинцијата Нигде во централна Анадолија, соопштија од центарот за следење на земјотреси во Кандили.
Епицентарот на земјотресот бил во областа Бор, на околу 350 километри западно од опустошената област во Турција и Сирија.
Од петокот вечерта во Турција беа регистрирани најмалку седум земјотреси со јачина од 4 степени според Рихтеровата скала, вклучително и во јужниот дел на земјата погодена од земјотресот, соопшти турската агенција за катастрофи АФАД.
Градоначалникот на градот Нигде, Емрах Оздемир за државната телевизија ТРТ изјави дека сè уште нема извештаи за штетата.
Сирија денеска соопшти дека во последните 24 часа забележала 61 нов земјотрес. Два земјотреси се регистрирани и во северен Ирак, пренесува ирачката државна новинска агенција ИНА.
Првиот е регистриран рано денеска во северната ирачка провинција Ниневија, а вториот во Ербил, главниот град на автономниот регион на ирачки Курдистан. Нема извештаи за жртви или материјална штета.
По големите земјотреси што ја погодија Турција на 6 февруари, се случија повеќе од 9.600 последователни потреси. Орхан Татар од АФАД изјави дека земјотресите би можеле да продолжат и во следните две години.
Агенцијата во петокот објави дека бројот на загинатите во Турција надмина 44.200 лица. Во соседна Сирија загинаа најмалку 5.900 лица, што значи дека вкупниот број на жртви од разорниот земјотрес во двете земји е над 50 илјади лица. Над половина милион луѓе беа евакуирани од погодената област во Турција.
