Нов правилник за лиценци во енергетиката – се менуваат процедурите за издавање и одземање дозволи

Регулаторната комисија за енергетика, водни услуги и услуги за управување со комунален отпад донесе нов Правилник за лиценци.

Со правилникот се уредуваат условите, начинот и постапката за издавање, менување, продолжување, пренесување, суспендирање, одземање и престанување на важење на лиценците за вршење енергетски дејности, како и лиценци за пробна работа на енергетски објекти.

Новината предвидува појасни рокови и процедури во постапките пред Регулаторната комисија, а во одредени случаи се воведува и можност за скратена постапка. Тоа се однесува особено на лиценци за трговија или снабдување со електрична енергија и гас, како и за изменување и продолжување на постојни лиценци.

Според правилникот, Комисијата е должна во рок од 10 дена од одржувањето на подготвителната седница да донесе одлука за издавање или одбивање на лиценца.

Со овој акт се операционализираат измените во Законот за енергетика и се поставува нова рамка за регулирање на енергетскиот пазар. Правилникот директно ги засега производителите, снабдувачите и трговците со електрична енергија и гас, како и сите идни инвеститори во енергетскиот сектор.