Нов биланс: Во земјотресот во Мјанмар загинаа повеќе од 2.000 луѓе
По разорниот земјотрес во Мјанмар бројот на загинати се искачи на над 2.000, објавија државните медиуми во понеделникот.
Спасувачите и групите доброволци велат дека во земјотресот загинале неколку стотици муслимани кои се молеле за време на Рамазан, како и дека 270 будистички монаси настрадале кога се урнал нивниот манастир.
Хуманитарните организации и Обединетите нации предупредија дека катастрофата може да ја влоши гладта и да предизвика појава на болести во земја која веќе е зафатена од граѓанска војна и во која владее една од најголемите хуманитарни кризи во светот.
Силен земјотрес со јачина од 7,7 степени според Рихтеровата скала во петокот го погоди регионот околу градот Мандалај, вториот по големина град во Мјанмар.
Тешко го оштети градскиот аеродром, уништи патишта и срамни со земја стотици згради низ централниот дел на земјата.
На фотографија што во понеделникот ја објави новинска агенција, се гледаат членови на кинескиот тим за потрага и спасување како извлекуваат преживеана бремена жена од урната зграда.
Спасувачките напори се забавени поради големи прекини во снабдувањето со електрична енергија, недостаток на гориво и лоша комуникација. Недостатокот на тешка опрема ја отежнува операцијата за спасување, бидејќи многу луѓе рачно копаат низ урнатините на температури повисоки од 40 степени.
Во урнатиот манастир Улатеин во Мандалај, спасувачките екипи соопштија дека сè уште трагаат по околу 150 монаси, за кои се стравува дека се мртви.
