„Ниту хемиска, ниту тешка индустрија“ – Стојкоски со отворено писмо до Арсовска
Градоначалникот на Општина Ѓорче Петров, Александар Стојкоски, остро реагира на изјавите на градоначалничката на Град Скопје, Данела Арсовска, во кои таа сугерира дека на територијата на општината се дозволува изградба на „хемиска фабрика“. Во отворено писмо до јавноста и медиумите, Стојкоски ги нарекува обвинувањата „сериозни, неосновани и тенденциозни“, оценувајќи дека целта е ширење паника и политичка конфузија.
„На територијата на нашата општина не постои ниту една локација на која е предвидена, ниту ќе се дозволи, изградба на објекти од тешка индустрија, а уште помалку ‘хемиски фабрики’, како што таа тенденциозно наведува“, пишува Стојкоски.
Според него, шпекулациите се однесуваат на веќе постоечки објект со намена Г2 – лесна и незагадувачка индустрија, што е во согласност со Генералниот урбанистички план на Град Скопје, за кој, како што нагласува, Арсовска има обврска да го почитува.
Стојкоски појаснува дека објектот има сопствена пречистителна станица, е под постојан надзор на Министерството за животна средина, и досега не е евидентирана ниту една еколошка забелешка или проблем. Напротив, како што вели, ги надминува дури и најстрогите еколошки стандарди.
„Со новиот детален урбанистички план што го усвоивме, три и пол пати е намалена површината за индустрија во споредба со претходниот план. Тоа е вистинската слика – нашите одлуки се во насока на заштита на животната средина“, наведува градоначалникот на Ѓорче Петров.
Во писмото, Стојкоски ја обвинува Арсовска за неуспешна и конфузна градска политика, обвинувајќи ја дека со лажни наративи се обидува да го прикрие сопствениот неуспех и да се наметне над институциите – па дури и над Уставниот суд.
„Иницијативата на г-ѓа Арсовска против општината беше целосно отфрлена. Уставниот суд утврди дека Општина Ѓорче Петров не донела ниту еден противзаконски акт“, потсетува Стојкоски.
Градоначалникот ја повикува јавноста да не подлегнува на „евтин политички театар“, уверувајќи дека Ѓорче Петров ќе продолжи со транспарентен развој, во интерес на граѓаните и во рамки на законот.
