Николоски од Лондон: Започнуваме нова историја за развој на Македонија
Вицепремиерот Александар Николоски денеска во Лондон, во име на Владата на Република Македонија, го потпиша Договорот Влада со Влада за политичка и економска соработка со Обединетото Кралство. Со потпишувањето на овој документ, на Македонија ѝ се ставаат на располагање 6 милијарди евра за финансирање на капитални проекти во повеќе стратешки сектори.
Николоски, заедно со владината делегација, истакна дека потпишувањето на договорот токму во историската „Черчилова соба“ во Министерството за трговија и бизнис во Лондон е симболичен чин и силен сигнал за продлабочување на партнерството меѓу двете земји.
„Ова стратешко партнерство со Обединетото Кралство го гледаме како чекор кој ќе ја доведе Македонија на едно ново ниво. Денеска потпишуваме договор за развојни инфраструктурни проекти во транспортот, образованието, животната средина, ИТ секторот и здравството. Благодарни сме што британската влада преку својот Инструмент за поддршка на надворешно финансирање постави рамка од 5 милијарди фунти – најголемата економска рамка во македонската историја“, изјави Николоски.
Според него, веќе се подготвени три проекти за имплементација: изградба на брза железница на Коридорот 10, нови болнички капацитети, како и нови образовни установи, вклучително и Медицинскиот факултет. Дополнително, се најавуваат и идни проекти во енергетиката и екологијата.
Николоски посочи дека покрај финансиската поддршка, Македонија ќе има корист и од британското административно и бизнис искуство, што ќе придонесе за унапредување на домашната јавна администрација и приватен сектор.
„Со нетрпение го очекуваме и Договорот за стратешко партнерство. Овие два договори ќе воспостават сосема нови односи меѓу нашите земји – надвор од НАТО-сојузништвото, кон уште посилна билатерална соработка“, нагласи Николоски.
