„Не сум виновен“, тврди Ангел Самараков, обвинет за издавање службени полициски тајни!
Ангел Самараков, полицаец и поранешен припадник на обезбедувањето на премиерот Христијан Мицкоски, на првото рочиште закажано во Основниот кривичен суд се изјасни дека не е виновен, пишува телевизија Телма.
Тој, заедно со својот адвокат, ги отфрли обвинувањата дека се обидел да пренесе службени полициски тајни на друго лице, за што наводно требало да добие 50 илјади евра преку посредство на колешка полицајка.
Обвинителката Ивана Трајчева изјави дека обвинението е поткрепено со цврсти видео-докази на кои, како што нагласи, се гледаат конкретните дејствија на обвинетиот.
Одбраната на Самараков тврди дека доставените материјали не се документи обележани како службени тајни и предложи петмина полициски службеници како сведоци. Меѓутоа, најголем дел од нив не беа прифатени од обвинителството, бидејќи, според нив, немаат директна врска со делото.
Сведок во случајот е Благоја Коруноски, на кого, според обвинителството, Самараков му ги дал документите. Одбраната, пак, укажа дека Коруноски има пресуда од 12 години затвор за убиство во Прилеп од 2006 година, а токму Самараков бил полицаецот кој го привел при неговото бегство од затвор.
Следното рочиште, кога треба да се соочат обвинетиот и сведокот, е закажано за 14 август, поради технички проблем со репродукцијата на доказите.
