Не оправдал потекло на два стана и автомобил – ДКСК бара кривично да се гони Фатмир Арифи
Државната комисија за спречување корупција на денешната седница донесе одлука да поднесе иницијатива за кривично гонење до Основното јавно обвинителство и иницијатива до Владата за разрешување на директорот на Државниот инспекторат за градежништво Фатмир Арифи, бидејќи констатираа дека тој пред Комисијата не го оправдал начинот на кој се стекнал со имот во изминатиот период.
Како што информираа членовите на комисијата, станува збор за стан во Чаир, стан во Железара и моторно возило во вредност од 18.000 евра. Како што велат од Антикорупциска, во анкетниот лист Арифи не ги пријавил становите во Чаир и Железара, ниту автомобилот кој го купил во 2021 година.
На барањето да се произнесе, тој на Антикорупциска одговорил дека се занимава со продажба на автомобили и дека едниот стан го стекнал со размена на автомобил со стан и тврдење дека за тоа има договор заверен на нотар, но сепак не доставил докази за тоа.
Воедно, освен платата, Арифи нема други официјални и пријавени примања.
