НЕ Е ДО БУЏЕТОТ, ЛОШИТЕ РЕЗУЛТАТИ ВО ПРАВОСУДСТВОТО СЕ ОД НЕДОСТИГ НА ПРАВДОЉУБИВОСТ Граѓаните се шокирани од одлуките на Врховен за „Модуларна“ и за „Ласкарци“
Лошите резултати во правосудството не се поради буџетот на судството и обвинителството, смета премиерот Христијан Мицкоски.
– Јас можам да ви гарантирам дека не станува збор за парите. Еве сега преку судски буџет судовите во Македонија добија дозвола за вработување на преку 200 луѓе и догодина ќе добијат уште толку. Платите им се покачени на судиите и чекаме одлука на Уставниот суд за обвинителите, но каква и да биде, позитивна или негативна, и тие ќе добијат покачување на платите. Ќе се доведеме во една ситуација во која што, да речеме, многумина од судиите во Апелација ќе имаат повисока плата од претседателот на Владата. Но, и тоа нека биде така. Јас ви гарантирам дека сето злато на светот да им го дадеме, ако нема чувство на одговорност и правдољубивост, бадијала е сè – рече Мицкоски во гостување на Сител.
Тој истакна дека со сегашниот буџет се предвидуваат многу повеќе средства за обвинителството и судството, како од порано, така и од повеќето земји членки на ЕУ.
– Јас зборувам за една мала група на луѓе, кои што ги контаминира другите луѓе. Еве да речеме каква е одговорноста на Врховниот суд? Дали некој прашува како работи Врховниот суд? Зошто кривичниот оддел при Врховниот суд континуирано поништува дела каде што се засегнати функционери од ДУИ и ги враќа во прв степен за да застарат? Граѓаните се шокирани од ваквите одлуки. Затоа велам може да имате прекрасни судии, и има прекрасни судии со одлуки поврзани со правото, стотици, но една ваква одлука сè поништува. Затоа што ова е политички сензитивна одлука, кога вие како судии во Врховен суд ќе вратите дело кое што поминало во Основен и на Апелација повторно на почеток, затоа што знаете дека тоа дело ќе застари и нема време лицето да биде правосилно осудено – истакна Мицкоски.
Тој ги повика медиумите да ги проверат судиите кои учествувале во носењето на одлуките за случаите „Ласкарци“ и „Модуларната болница“ и зошто се донесени таквите одлуки. Според него таквите одлуки ги фрустрираат граѓаните и него лично, бидејќи создаваат чувство дека нема борба против криминалот.
– Сте слушнале ли за отчет на Врховниот Суд, еве за кривичниот оддел? Сте виделе ли вие кои се таму судии во кривичниот оддел? Еве проверете – рече Мицкоски.
.
Извор: plusinfo.mk
