Навални 20 дена патувал до злогласениот затвор кој е прекриен со снег: Вели носи капут од овча кожа!
Навални зборуваше за прв пат по пристигнувањето во еден од најстрогите затвори во Русија.
Алексеј Навални, затворениот руски опозициски политичар, го потврди своето пристигнување во затвор над Арктичкиот круг. Навални преку своите адвокати на Твитер (сега Х) објави дека затворот е покриен со снег и дека е добро и покрај напорното патување до таму, кое траеше 20 дена. Тимот на Навални вчера соопшти дека е пронајден, откако на 11 декември беше пријавено дека исчезнал и не е во затворот во кој се наоѓал.
„Патувањето до новиот затвор траеше 20 дена и беше доста заморно. Како и да е, не грижете се за мене. Добро сум. Олеснет сум што конечно пристигнав“, изјави Навални на „Х“.
Новиот дом на Навални е колонијата „Поларниот волк“, еден од најтешките руски затвори. Портпаролката на Навални, Кира Јамиш, вчера изјави дека тој се наоѓа во населбата ИК-3 Харп во автономниот округ Јамало-Ненец. Ова место е оддалечено повеќе од 3000 километри од Москва и се наоѓа на Арктикот.
Тој претходно беше во затвор на 241 километар од Москва. Јамиш рече дека адвокатот денеска го посетил Навални и дека затворениот политичар се чувствува добро. Во објава на X, Навални ги опиша суровите временски услови во новата затворска колонија.
Сега имам капут од овча кожа, ушанка (крзнена капа), а наскоро ќе добијам и валенки (традиционални руски зимски обувки). 20-те дена од трансферот беа доста заморни“, изјави Навални, кој се пошегува дека личи на Дедо Мраз. .
Новиот дом на затворениот руски политичар, познат како колонија „Поларниот волк“, се смета за еден од најстрогите затвори во Русија, пишува Ројтерс. Повеќето од затворениците таму беа осудени за тешки кривични дела. Оваа недела температурата во тој дел на Русија ќе се движи околу минус 28 Целзиусови степени.
