National Geographic: Секој алпинист создава 8 килограми отпад на Еверест
Познатиот американски планински водич кој неодамна го постигна реткиот подвиг да се искачи на Монт Еверест и два блиски врва за помалку од три недели, повика највисоката планина на светот да се „спаси од тони ѓубре“. Ова го пренесува агенцијата Ројтерс.
Герет Медисон (44), кој минатата недела по 13-ти пат се искачи на Монт Еверест високата 8.849 метри , рече дека видел „искинати шатори, обвивки со храна и празни боци со кислород фрлени од планинарите“ во повисоките кампови.
„Мораме да најдеме подобри начини за собирање на отпадот “, рече Медисон, кој е во непалскиот главен град Катманду по уште едно спуштање од планината. Тој е категоричен дека е потребен подобар полициски надзор, како и проверка „дали секој тим го отстранува своето ѓубре на крајот од експедицијата“.
За алпинистите е задолжително да го носат својот отпад надолу доколку сакаат да си го вратат депозитот од 4.000 долари, наметнат пред извесно време од владата. Но, организаторите на експедицијата и туристичките власти велат дека следењето на камповите на околу 8.000 метри е и тешко и неефикасно.
Властите собраа 13 тони ѓубре од Еверест и блиската планина Лотсе оваа година како дел од кампањата за одржување на чистотата на планините. Сепак, не така одамна, Еверест беше наречен „највисоката депонија во светот“ поради децениското комерцијално планинарење.
National Geographic проценува дека секој планинар генерира околу осум килограми отпад , кој вклучува контејнери за храна, шатори, празни резервоари со кислород, па дури и човечки измет. Исцрпените планинари, борејќи се за секој здив на кислород, често ги напуштаат тешките шатори наместо да се обидуваат да ги симнат.
