Насилниците да носат електронска нараквица: ЛДП реагира по убиството на Росица и нејзиниот татко
Либерално демократската партија (ЛДП) денеска побара итно воведување на електронски нараквици за насилници, по трагичниот случај во Велес, кога Росица и нејзиниот татко беа брутално убиени од Илија Стефановски. Од партијата истакнуваат дека ваквата трагедија треба да биде последна.
„Доколку предложените измени на Законот за спречување и заштита од насилство врз жените и семејното насилство, поднесени од нашата пратеничка и претседателка Моника Зајкова, веќе беа на сила, насилникот ќе носеше електронска нараквица, а Росица и нејзиниот татко сѐ уште ќе беа живи“, изјави Цветанка Геговска, членка на Извршниот одбор на ЛДП.
Геговска појасни дека електронската нараквица ќе ја предупредува жртвата доколку насилникот се приближи на растојание од 100 метри и ќе ја зголеми нејзината безбедност.
Од ЛДП ги повикаа сите пратеници, без разлика на партиската, етничката или верската припадност, да го поддржат предлог-законот, да се воведат електронските нараквици и да се стави крај на ваквите трагични и девијантни појави во општеството.
