Мицкоски: Нема да има предвремени парламентарни избори – владината коалиција е стабилна!
Премиерот Христијан Мицкоски денеска изјави дека нема да има предвремени парламентарни избори, истакнувајќи дека владината коалиција е стабилна и очекува победа на локалните избори закажани за 19 октомври.
– Владата има мандат од четири години, време во кое треба да се реализираат ветените проекти. Предвремени избори би значеле нивно одложување за најмалку шест месеци, истакна Мицкоски на прес-конференцијата.
Тој додаде дека, иако од гледна точка на ВМРО-ДПМНЕ можеби би било погодна опција, одлуката се води државнички, а не партиски.
Прашан за можни инциденти на локалните избори и за играње на картата на национализмот, Мицкоски рече дека нема сознанија за планирани проблеми и оцени дека некои партии се фокусираат на етнички поделби бидејќи немаат реализирани проекти за граѓаните.
– Ние ќе водиме кампања со смирувачки тонови, со фокус на реални и изводливи проекти, додаде Мицкоски, нагласувајќи дека работата на терен е приоритет за понудата кон граѓаните, додека другите партии се ориентирани кон минатото и етничките поделби.
