НАПРАВИЈА ЗЛОСТОРСТВА ВО ЕСМ, ФИЛИПЧЕ И СДСМ ДА НЕ КОМЕНТИРААТ ЗА ЕНЕРГЕТИКАТА Штетата од нив не може да се санира за една година
Венко Филипче и СДСМ се последните што имаат кредибилитет да зборуваат за состојбите во енергетиката, реагира ВМРО-ДПМНЕ на прес-конференцијата на Филипче, кој рече дека производството на електрична енергија од домашните капацитети е на историски најниско ниво досега.
„Токму раководствата поставени од нив оставија сериозни структурни, технички и финансиски последици врз домашните производни капацитети. Наследени беа деградирани и недоволно одржувани рудници за јаглен, запуштена и застарена опрема во термокапацитетите, истрошени хидропотенцијали, што се состојби што не може да се санираат за една година“, соопшти ВМРО-ДПМНЕ.
Дополнително, се додада, дел од поранешните одговорни лица се предмет на постапки пред надлежните институции, а компанијата соработува во целост со истрагите и очекува секој пропуст да биде утврден согласно законот.
„При преземањето на компанијата, ЕСМ беше во исклучително тешка финансиска состојба со производствена цена од околу 140 евра за мегават-час, загуби од повеќе од 130 милиони евра и доспеани, неплатени обврски кон деловни партнери над 80 милиони евра. Ова е реалната слика што ја остави СДСМ и која ја загрози стабилноста на целиот енергетски систем“, се вели во соопштението.
Во тој контекст, се додадав, лицемерна е тезата на Филипче дека електрична енергија можела да се произведува за 85 евра за мегават-час и е во спротивност со фактичките бројки и состојбата што беше затекната.
„Против раководствата кои ја управувале компанијата во периодот од август 2017 до август 2024 година се поднесени пријави до надлежните институции, и веруваме дека сите до еден ќе одговараат за своите злосторства во една од најзначајните државни компании. Имајќи го предвид ова наследство, најмалку што може да направи СДСМ е да се воздржи од коментирање на теми поврзани со енергетиката, барем додека институциите целосно не ги расчистат сите пропусти и последици од нивното управување“, соопшти ВМРО-ДПМНЕ.
Во изминатата година се намалени затекнатите загуби, а цената на произведената електрична енергија е намалена за околу 22 проценти. Но, и покрај сите предизвици АД ЕСМ понуди минимално повисока цена кон Универзалниот снабдувач, додава ВМРО-ДПМНЕ.
– За само година и пол, ВМРО-ДПМНЕ го спушти производството на историски најниско ниво. Во енергетскиот биланс за 2025 година ЕСМ предвидело производство од 5.100 GWh, a во периодот јануари–октомври е само 2.450 GWh, што е помалку од 50% планираното. Купена е струја за многу повисоки цени, потрошени се 62 милиони евра за да се надокнади оваа струја – рече Филипче.
Тој додаде дека поради овие причини следува поскапување на струјата, а со тоа раст на сите други цени.
.
