Напад пред израелската амбасада во Белград, полицијата го уби напаѓачот
Едно лице е убиено од српската полиција откако, според официјалните информации, со ножеви нападнало припадник на Жандармеријата кој ја обезбедувал израелската амбасада во Белград.
Вршителот на должност министер за внатрешни работи на Србија, Ивица Дачиќ, го оквалификува инцидентот како терористички напад. Според неговата изјава, нападот се случил кратко по полноќ, кога осомничениот му се приближил на полицаецот со два ножа и го повредил лесно во пределот на лицето.
Припадникот на Жандармеријата возвратил со службеното оружје, при што напаѓачот бил убиен. Според Министерството за внатрешни работи, полицаецот дејствувал во самоодбрана.
Според Дачиќ, идентитетот на осомничениот сè уште не бил потврден, а постоеле сомневања дека станува збор за малолетно лице од градот Шабац.
По инцидентот, српските власти го подигнале нивото на терористичка закана на највисоко ниво и прогласиле „црвен степен на опасност“. Мерките предвидуваат засилени безбедносни контроли и зголемено полициско присуство на чувствителни локации, критичната инфраструктура и местата каде што се собираат поголем број луѓе.
Српските власти го третираат случајот како терористички напад, а истрагата треба да ги утврди сите околности и мотивите на напаѓачот.
