НАМАЛЕНИ СЕ ШАНСИТЕ ЗА НОВИ ЗЕМЈОТРЕСИ: На Санторини се регистрирани 21.500 потреси

Сеизмолозите регистрирале околу 21.500 потреси во близина на грчкиот остров Санторини во последните три недели, објави Универзитетот во Атина.

Санторини аде што беше воведена вонредна состојба претходно овој месец е во голема неизвесност откако почна серијата земјотреси. Интензитетот на потресите е значително намален во изминатите неколку дена, па научниците се надеваат на постепено намалување на сеизмичката активност.

Грчкиот премиер Кирјакос Мицотакис во интервјуто за „Блумберг“ денеска се осврна и на ситуацијата на островот, објасни дека во последните денови има намалување на сеизмичката активноста, „што е охрабрувачки“.

„Секако, секогаш ги слушаме научниците и треба да бидеме подготвени за сите евентуални можности. Сепак, Грција е безбедна земја и ова е порака што сакам да ја испратам. Никој не може да ја предвиди иднината, но ние сме воздржани оптимисти за она што се случува на Санторини. И ако работите се одвиваат како што треба, се надеваме на тоа, релативно брзо ќе се вратиме во нормална состојба“, изјави Мицотакис. 

Сепак, сеизмолозите не можат да ја исклучат можноста за голем земјотрес со јачина од шест или повеќе степени според Рихтеровата скала, јави агенцијата ДПА.

Постои веројатност до 300 објекти на работ на кратерот Санторини да се урнат во случај на силен земјотрес.

Кратерот Санторини е формиран од вулканска ерупција пред околу 3.600 години, а на неговите стрмни рабови сега се наоѓаат куќи и хотели.

foto EPA-EFE/ORESTIS PANAGIOTOU