Наградата патент на годината за еколошкиот систем за гасење пожар на изумителите Борис Јанковски и Искра Јанковска-Михајловска од „Веда“
Еколошкиот систем за гасење пожари, дело на компанијата „Веда“ и изумителите Борис Јанковски и Искра Јанковска-Михајловска, ја освои наградата Патент на годината – највисокото државно признание за иновации, што традиционално го доделува Државниот завод за индустриска сопственост. „Веда“ е мала семејна фирма, основана во 1991 година од инженерот и истражувач Јанковски, а денес со неа управува неговата ќерка Јанковска-Михајловска.
Наречен „Систем за сузбивање и гасење пожар во литиум јонски батерии и други затворени простори“, изумот овозможува гасење во моментот на настанување на пожарот, што е приоритет во техниките на гасење. Овој пронајдок користи супстанца што е потврдена како нетоксична според меѓународни стандарди и протоколи, а тоа е важно затоа што Европската комисија постојано ги заострува регулативите поврзани со емисија на токсични гасови.
„Оваа супстанца е соодветна за употреба во станбени и јавни простори, во простории каде што има луѓе и е безбедна алтернатива на постојните системи за гасење пожари, кои поради нивната штетност за околината се во процес на повлекување во Европската унија. Системот може да се примени во различни сектори, електрични возила, камиони, автобуси, воена и полициска опрема, системи за производство на енергија од сонце и ветер. За време на ковид кризата со тимот работевме интензивно на овој систем, со поддршка на Фондот за иновации, и стасавме до фаза кога веќе може да влезе во индустриско производство“, вели изумителот Јанковски.
Овој пронајдок во 2022 ја доби првата награда на американскиот натпревар за висока технологија поддржан од американската армија и Министерство за одбрана на САД, а следната година Искра Јанковска-Михајловска во Вашингтон го доби признанието „Жена во фокус на технологијата“.
„Драго ми е што со ова признание Патент на годината завршува процедурата дома, а ние ќе продолжиме и понатаму и ќе го патентираме нашиот пронајдок и во странство. Ова е многу значајно за развој на нашиот бизнис, бидејќи сме фирма што ги продава технологиите што ги создава. Но, без иновации нема напредок. Така што, значењето на овој пронајдок ги надминува границите на нашата фирма и на нашата држава. Тој е значаен за развојот на различни бизниси во кои може да се имплементира, а во исто време да ја заштити животната средина“, вели Јанковска-Михајловска.
