Над 5.000 жртви од земјотресите во Турција
Над пет илјади се жртвите во Турција и Сирија по двата силни земјотреси. Повредени се околу 20 илјади луѓе. Уништените згради се повеќе од 5 илјади, вклучувајќи ги и болниците.
Повеќе од 2.600 странски спасувачи пристигнаа во Турција за да помогнат во клучните часови по земјотресите. До денес се регистрирани 185 последователни потреси. Грција и Шведска, исто така, понудија помош за Турција.
Турската медитеранска провинција Хатај е меѓу најтешко погодените од природната катастрофа.
Илјадници луѓе ја поминаа ноќта на отворено поради страв од нови потреси. Студеното време и врнежите од дожд и снег го блокираа аеродромот во Дијарбекир и ги отежнаа спасувачките напори. Некои градови како Османије остануваат без струја.
Трка со времето и во соседна Сирија, каде руската војска беше активно вклучена во спасувачките операции. Таму сигнализираат недостиг од гориво.
„Патиштата што досега ги користевме за хуманитарна помош се оштетени, мораме да бидеме снаодливи за да го доставиме она што им треба на луѓето“, објасни Мостафа Банламлич, координатор на ОН.
Зрак надеж среде трагедијата – мајка даде живот пред да почине под урнатините на Алепо.
