На свечена седница по повод Денот на ослободувањето на Кочани, доделена награда на „Support Kocani“
На свечена седница на Советот на Општина Кочани, одржана денеска по повод претстојниот празник 7ми Септември – Денот на ослободувањето на градот, беше доделена наградата за значајни остварувања за развојот на општината.
Оваа година, престижното признание му беше врачено на здружението „Support Kocani“, како признание за нивниот континуиран придонес, хуманитарни акции и вложувања во локалната заедница.
Од „Support Kocani“ изразија огромна благодарност и чест за добиената награда.
„Оваа награда ни дава дополнителна мотивација да останеме посветени на нашите цели и да му помагаме на нашето Кочани. Ви благодариме од срце“, порачаа од здружението по добивањето на признанието.
Наградата традиционално се доделува на поединци, компании или организации кои со својата работа оставиле значаен белег во унапредувањето на животот и развојот на Кочани.
По шест месеци неуморна работа, волонтерите од ‘Супорт Кочани’ велат дека нема да застанат – и покрај заморот, нивната љубов, мотивација и истрајност остануваат силни во борбата Кочани никогаш да не биде заборавено.
-Сакаме да им се заблагодариме на сите хумани луѓе кои покажаа солидарност и емпатија во нашите најтешки моменти. Вие ни дававте сила и храброст сите овие месеци да помагаме на нашите сограѓани. Ние иако уморни, психички и физички, после скоро 6 месеци, сеуште не се откажуваме и напорно работиме.
Супорт Кочани не застанува тука – ние како волонтери со можеби не толку голема енергија, но со иста љубов, мотивација и истрајност ќе продолжиме да работиме и да постоиме.
Како што ветивме од самиот старт -нема да дозволиме Кочани да биде заборавено.
