Најмногу дожд наврнал на Попова Шапка и во Пожаране – по 32 литри на метар квадратен

Утрово најниска температура е измерена во Берово, Маврови Анови и Лазарополе – 5 степени, а најтопло било во Демир Капија со 13 степени Целзиусови. Во Крушево температурата изнесувала 7, во Крива Паланка 8, додека во Тетово, Претор и Прилеп се измерени 9 степени. Во Скопје, Охрид, Велес, Виница, Кавадарци и Струмица минималната температура достигнала 10 степени, во Битола 11, во Штип и Гевгелија 12 степени.

Во изминатите 24 часа најмногу врнежи се регистрирани во Пожаране и на Попова Шапка – по 32 литри на метар квадратен. Следуваат Маврови Анови и Крушево со по 23 литри, Тетово со 21, Претор со 20, Лазарополе со 14, а во Гевгелија се измерени 11 литри врнежи. Помали количества дожд се забележани во Битола и Тополчани (по 9 литри), Скопје – Зајчев Рид (6), Ѓуриште и Пожар–Радовиш (по 5), Прилеп, Велес и Скопје–Петровец (по 4 литри), додека најмалку дожд наврнал во Штип и Кавадарци – по 1 литар на метар квадратен.

Денеска времето ќе биде променливо облачно со повремени локални врнежи од дожд. На одделни места врнежите ќе бидат поројни и пообилни, со над 30 литри на метар квадратен за 24 часа, проследени со засилен ветер и ретка појава на грмежи. Ќе дува умерен до засилен ветер од јужен, а долж Повардарието од југоисточен правец. Максималната температура ќе се движи од 12 до 17 степени.

Во Скопје ќе преовладува претежно облачно време со повремени врнежи од дожд и умерен до засилен југоисточен ветер. Максималната дневна температура ќе достигне до 15 степени.