НАЈГОЛЕМИОТ СРПСКИ ТЕЛЕКОМУНИКАЦИСКИ ОПЕРАТОР ПРЕД НОВА ЗДЕЛКА – „Телеком Србија“ купува фирма од Златибор за интернет и дистрибуција на медиумска содржина

Продолжува да се шири групацијата на Телеком Србија. Откако пред неколку
дена објавија дека постигнале договор за купување на NetTV Plus, DTH во Србија и 
Македонија и лиценцата за правата на Sport Klub за Западен Балкан од United
Group, во петокот минатата недела стигна нова објава, а таа е
дека купуваат дел од СКЈНЕТ КТВ ДОО од Златибор.

Информацијата ја објави нашата Комисија за заштита на конкуренцијата, која
треба да ја разгледа оваа зделка, со оглед што големиот српски оператор Телеком
Србија кај нас има свои деловни активноси, односно ја поседува компанијата МТЕЛ.

„До
Комисијата за заштита на конкуренцијата е доставено известување за
концентрација со кое ‘Телеком Србија’ акционерско друштво со регистрирано
седиште во
Белград, Србија ќе стекне поединечна контрола, односно право на
сопственост на дел од работењето односно над инфраструктурата на СКЈНЕТ КТВ ДОО, со
регистрирано седиште во Златибор, Србија“, се вели во објавата
од нашата КЗК.

Како што е веќе познато, а како што наведуваат и од КЗК, „Телеком Србија“ е оператор за електронски комуникациски
услуги и мрежи, регистриран за кабелски телекомуникации, а од услугите што ги
дава, се извдвојуваат услугите за фиксна и мобилна телефонија,
интернет и мултимедијални услуги на територија на Србија.

Она што е битно за македонскиот пазар е дека „Телеком
Србија“ има поврзано лице на
територијата на земјава, и тоа друштвото
за трговија и услуги МТЕЛ ДООЕЛ Скопје, а кое е регистрирано за дејноста жичани телекомуникации, односно за давање на услуги
како што се јавна радио-комуникациска
мрежа, широкопојасен пристап на интернет, меѓуоператорски услуги, јавно
достапни телефонски услуги во јавна мобилна комуникациска мрежа, реемитување на
телевизиски програмски сервиси, и сателит.

Додека, пак, СКЈНЕТ КТВ, ДОО Златибор е оператор за
електорнски комуникациски услуги и мрежи, регистриран за давање услуги на
фиксен широкопојасен пристап на интернет, малопродажен пазар за давање услуги
на дистрибуција на медиумска содржина на територија на Србија. СКЈНЕТ КТВ, ДОО
Златибор нема поврзани правни лица на територија на земјава, ниту пак тука има остварено некакви приходи.

„Подносителот
на известувањето предлага како релевантен пазар во предметната концентрација да
биде малопродажен пазар за фиксен широкопојасен пристап на
интернет, и малопродажен пазар за дистрибуција на медиумска
содржина. Врз основа на
прелиминарното испитување, Комисијата утврди дека предметната концентрација може
да потпадне под одредбите на Законот за заштита на конкуренцијата. Сепак
конечната одлука по ова прашање е резервирана. Комисијата ги повикува
заинтересираните трети страни да достават забелешки и мислења за оваа
концентрација до Комисијата“, се
вели во објавата на КЗК на нивната веб страница.

Како што деновиве пишуваше Фактор, групацијата Телеком Србија објави дека постигнала договор за
купување на NetTV Plus, DTH во Србија и Македонија и лиценцата за правата
на Sport Klub за Западен Балкан од United Group.

Или поконкретно, групацијата Телеком
Србија „постигна договор за стекнување на 100 проценти од акциите во Eon
TV International Ltd (холдинг-компанија на NetTV Plus), бизнисот директно до
дома (DTH) во рамките на EoNSat и Total TV во Србија и Северна Македонија, како
и за стекнување на одредени права, лиценци и други средства поврзани со
каналите Sport Klub за Западен Балкан и Хергејска Групација во Србија и
Херцеговина, и Македонија, за сума од 652 милиони евра, безготовински и без долгови“,
беше наведено во соопштението.

Натаму, како што наведоа од Телеком Србија, овие трансакции се усогласени
со нивната стратегија за
изградба на водечка телекомуникациска компанија во Западен Балкан, при што
приходите, како што објавија, ќе
достигнат три милијарди евра до 2030 година.

„По
успешната премиерна емисија на еврообврзници во 2024 година, во износ од 900
милиони американски долари, денешното купување на имотот на Групацијата
Јунајтед дополнително ќе ја зајакне позицијата на Телеком Србија во регионот и
меѓу дијаспората на поранешна Југославија“, беше нагласено во
соопштението, каде што и се
додаваше дека затворањето на трансакциите е предмет
на вообичаени регулаторни одобренија, како и дека се
очекува да биде завршено во текот на првата половина на 2025 година.

Во ноември лани, пак, објавивме дека Телеком
Србија подготвува аквизиција на удел во компанија во својата матична држава, и тоа во фирма за сајбер безбедност. Практично, удел во друштвото „Пулсец ДОО“ од Белград, регистриран
давател на дејности на компјутерско програмирање, и што е многу
битно, технолошка компанија специјализирана
за имплементација на напредни cybersecurity решенија, а со цел заштита на
клиентите, нивните податоци и корисниците од cyber пречки.

Инаку, во ноември лани, МТЕЛ, кои се членка на Групацијата Телеком Србија, објавија дека успешного завршиле
процесот на аквизиција на Lyca Mobile, како значаен момент во посветеност на
компанијата за проширување на своите услуги и збогатување на искуствата на
корисниците во Македонија.

„Преговорите и сите административни постапки за
преземање на телекомуникацискиот оператор Lycamobile се успешно завршени и од
денеска Lyca mobile станува МТЕЛ. Станува збор за аквизиција што е дел од нашите стратешки
планови за раст и развој на македонскиот телекомуникациски пазар, план кој што
продолжуваме да го реализираме и понатаму со цел зголемување на пазарниот удел,
бројот на корисници, бројот на вработени и понудата на врвни телекомуникациски
услуги за македонските корисници“, изјави тогаш генералниот директор
на МТЕЛ, Марко Лопичиќ.

Н.Н.Ф.