НА ДЕНОТ НА ЖЕЛЕЗНИЧКАТА НЕСРЕЌА СИ ЗАМИНАЛЕ ПОРАНО ОД РАБОТА: Грција ќе гони уште три лица
За железничката несреќа која неодамна се случи во Грција, при што загинаа 57 луѓе, освен шефот на станицата, властите кривично ќе гонат уште три лица.
Tие се вработени во грчката железница, објави онлајн изданието на весникот „Катимерини“. Покрената е постапка против инспекторот на железницата, затоа што го ставил ноќна смена сега веќе уапсениот шеф на станицата и уште двајца шефови на станицата во Лариса кои требало да работат до 23 часот, но си заминале порано. Се товарат за нарушување на безбедноста на превозот, што е кривично дело за што следува казна затвор од десет години до доживотно, како и за убиство од небрежност.
Шефот на станицата неколку часа по несреќата си добил боледување иако лекарите не го прегледале. Човекот истиот ден направил и друга грешка, односно погрешно насочил друг воз. Несреќата поттикна насилни протести во Грција.
