На чекор до „роаминг како дома“, Андоновски најави дека Законот е готов, се чека потег од Брисел
Македонските граѓани и бизниси наскоро би можеле да патуваат низ Европската Унија без страв од високи сметки за мобилен телефон. Откако Европската комисија вчера соопшти дека ќе започне билатерални преговори со земјите од Западен Балкан за укинување на роамингот, министерот за дигитална трансформација Стефан Андоновски потврди дека државата забрзано работи на исполнување на условите.
Според Андоновски, македонската Влада веќе ги има направено клучните чекори за прилагодување на домашната легислатива кон европските правила.
Тој најави дека до средината на март ќе бидат целосно подготвени законските измени на Законот за електронски комуникации, заедно со потребните правилници.
Иако процесот е во напредна фаза, министерот објасни дека во овој момент не може да се прецизира точен датум кога опцијата „роаминг како дома“ ќе стапи на сила. Причината за тоа е обемната работа која претстои на европска страна.
Сепак, Андоновски е оптимист дека штом Македонија го заврши својот дел, Брисел брзо ќе реагира.
Конечната цел на оваа иницијатива е целосно бришење на границите во телекомуникацискиот сообраќај, што ќе значи дека граѓаните и компаниите од државата ќе можат да ги користат своите мобилни услуги каде било во ЕУ без никакви дополнителни трошоци.
