На 28-ми септември, г.г. Стефан ќе го освети Храмот „Св. Константин и Елена“
После 13 години градилиште и лимени тараби, кои со години го нарушуваа изгледот на улицата „Македонија“ во центарот на Скопје, црквата „Св. Константин и Елена“ конечно е целосно завршена. Храмот е подготвен за свечено отворање.
Како што пренесува ТВ21, осветувањето на храмот ќе се одржи на 28 септември. Светата литургија ќе започне во 8:30 часот, а чинот на осветување ќе го изврши поглаварот на МПЦ-ОА, г.г. Стефан, во сослужение со архиереите на Македонската православна црква.
„Осветувањето на храмот Св. Константин и Елена ќе биде на 28 септември. Поканет е државниот врв, дипломатскиот кор, стопанственици, претставници на локалната самоуправа, медиуми, како и сите верници кои сакаат да присуствуваат на овој торжествен чин“, велат од Скопската епархија на МПЦ, пренесува ТВ21.
Изградбата на храмот започна во 2012 година, а средствата во почетокот се обезбедуваа преку донаторски конференции на кои учествуваа политичари, бизнисмени и владици. Сепак, поради финансиски потешкотии, изградбата траеше цели 13 години.
Од МПЦ потсетуваат дека во изминатите години повикувале општествено одговорни личности да помогнат за довршување на објектот, и дека многу бизнисмени дале значаен придонес. Меѓу нив, како што информираат, е и бизнисменот Кочо Анѓушев, кој го финансирал изработувањето на фреските и целокупниот фрескопис.
