МВР: Од вторник започнува тестирање на камерите!
Министерството за внатрешни работи (МВР) испрати важно известување до сите учесници во сообраќајот. Од наредниот вторник (20 јануари) започнуваат интензивни активности поврзани со проектот „Безбеден град“, кои можат да предизвикаат привремени прекини на сообраќајот.
Во наредните десет дена, екипите на МВР ќе вршат техничко прилагодување на системот за видео надзор.
Во периодот од 20.01 (вторник) до 31.01 (сабота), ќе се врши тестирање, калибрација и верификација на поставените уреди (камери) за сообраќаен надзор. Тестирањата ќе се реализираат секој ден во дневниот термин од 08:00 до 20:00 часот.
Она што е најважно за возачите е предупредувањето за можни застои.
Од МВР прецизираат дека во првата недела од предвидениот период, активностите ќе се спроведуваат исклучиво на локациите со поставени камери на подрачјето на град Скопје.
МВР ги повикува граѓаните да ги почитуваат привремените ограничувања и бара разбирање и трпение за да се реализираат планираните активности безбедно и непречено.
