Муцунски од Дубаи: Потпишуваме меморандум за модернизација на јавната администрација со ОАЕ
Министерот за надворешни работи, Тимчо Муцунски, во своето обраќање од Обединетите Арапски Емирати информираше за учеството на македонската делегација, предводена од претседателката Гордана Силјановска-Давкова, на Светскиот самит за влади во Дубаи.
Муцунски истакна дека овој самит претставува една од клучните глобални платформи посветени на иднината на владеењето, економијата и меѓународната соработка.
Во рамки на посетата, тој ќе оствари средба со вицепремиерот и министер за надворешни работи на ОАЕ, шеикот Абдула, при што ќе биде потпишан меѓувладин меморандум за разбирање и соработка во областа на модернизација на владата и државната администрација.
На маргините на самитот, министерот најави повеќе билатерални средби со шефови на држави и високи претставници, со цел продлабочување на политичката и економската соработка и унапредување на меѓународната позиција на државата.
Тој порача дека економијата, дигитализацијата и конкретните резултати се во фокусот на активностите, со јасна цел придобивките од оваа посета директно да ги почувствуваат граѓаните.
