Му ставија привремен пејсмејкер на норвешкиот крал

На 87-годишниот норвешки крал Харалд V му е поставен привремен пејсмејкер во Малезија, јави ДПА. Причината е бавниот пулс на монархот, прецизираат од палатата во Осло.

„Одлуката беше донесена утрово и операцијата беше успешна. Кралот се чувствува добро, но сепак му треба одмор“, се вели во соопштението на палатата.

„Пејсмејкерот ќе го направи побезбедно за кралот да се врати дома за неколку дена“, изјави за ДПА, анестезиологот на Харалд, Бјорн Бендз.

Потсетуваме дека кралот заболел од инфекција за време на одмор во Малезија и оваа недела бил однесен во локална болница. Вчера авион слета на аеродромот Лангкави за да го однесе дома.

Норвешкиот кралски двор во четвртокот (29-ти февруари) објави дека најстариот монарх во Европа сè уште се лекува во болница и дека целта е тој да може да лета назад во Норвешка за неколку дена.

Кралот Харалд V веќе некое време се бори со здравствени проблеми. Неодамна имаше респираторна инфекција.

Норвешкиот крал е на тронот од 1991 година, кога ја презеде функцијата од својот татко, кралот Олаф V.