МРТ ја запре постапката за избор на Надзорен одбор – ќе следи нов конкурс
Програмскиот совет на Македонската Радио Телевизија донесе одлука за запирање на постапката за избор на членови на Надзорниот одбор, со што се поништува конкурсот распишан на 23 мај 2025 година од претходниот состав на Советот.
Одлуката следи откако во јуни беше избран нов состав на Програмскиот совет, со што, според образложението, престанал мандатот на стариот орган кој ја започна постапката, а не ја заврши во предвидениот законски рок.
„Се доведува во прашање законитоста на постапката ако се земат предвид одредбите од Законот за општа управна постапка, Законот за аудио и аудиовизуелни медиумски услуги, како и Статутот на ЈРП МРТ“, стои во решението.
Од МРТ нагласуваат дека административната комисија која ја спроведувала постапката нема правна основа да продолжи со работа, бидејќи таа била формирана од орган со истечен мандат. Дополнително, постапката не била завршена во рок од 60 дена, без формално продолжување.
„Се нарушува начелото на фер и конкурентен изборен процес, што е клучно за транспарентен избор на надзорен орган“, се вели во образложението.
Од МРТ најавуваат дека ќе распишат нов јавен конкурс, кој ќе се спроведе според подобрени услови и во рамки на полна законска процедура.
Сите пристигнати пријави од досегашниот конкурс ќе бидат вратени на кандидатите по пошта, а Одлуката за запирање на постапката е објавена на веб-страницата на МРТ.
