Модриќ: Реал никогаш не барал да се откажам од Хрватска!
Модриќ со Хрватска има сребро од СП во Русија во 2018 година и бронза на последното СП во Катар, па најави дека ќе продолжи да игра за „коцкестите“ до фајнлфорот во Лигата на нациите летово, а потоа ќе донесе одлука дали ќе исутка уште еден циклус за Еуро 2024 и континенталниот шампионат да биде негов последен голем турнир.
„Јас како што реков после СП во Катар, план ми е да играм за Хрватска до крајот на Лигата на нациите. Не сум донел одлука што потоа. Ќе видиме, но мора добро да размислам. Реал никогаш не барал да престанам да играм за репрезентацијата. Не е нивен стил да поставуваат ултиматуми. И плус, настапите за Хрватска никогаш не влијаеле за моите настапи во Реал. Многу се зборува за моите години, а јас покажав дека можам да играм и за Реал и за Хрватска. После Лигата на нации ќе донесам одлука што потоа“, рече Модриќ.
Тој додаде дека е мирен за новата соработка, потенцирајќи дека „кралскиот клуб“ е клуб на неговиот живот.
„Јас после СП играм сѐ подобро, добро се чувствувам и се надевам така ќе биде до крај на сезоната. Не можам ништо да кажам за продолжување на договорот, зашто сѐ уште не сум разговарал со раководството. Но, мирен сум, секогаш истото го повторувам – сакам да останам! Јас прво мора да разговарам за да видам што мислат во клубот. Сакам да го заслужам договорот, а не да ми го подарат. Никој ништо во живот не ми подарил и сакам да останам поради заслуги. А, ништо не може да го смени моето мислење за Реал, тоа е клуб на мојот живот и никој и ништо не може да го промени тоа“, додаде Модриќ.
