Мобилен телефон најден во ќелијата на Нехат Нухи
При претрес во затворската ќелија на поранешниот економски директор на Онкологија, Нехат Нухи, полицијата пронашла мобилен телефон. Со оваа информација започна денешното рочиште за случајот „Онкологија“, во кој поранешните директори Васев и Нухи се обвинети за незаконско раководење со клиниката. Двајцата остануваат во притвор.
Во судницата, Нухи тврдеше дека телефонот не е негов и дека го нашол во ќелијата.
„Не знам што згрешив за да ми упадне полицијата во ќелијата и да се однесува недостојно. Првпат во животот клекнав на колена. Телефонот не е мой, го најдов таму. Го користев само за апликации, бидејќи како човек имам потреба од контакт со семејството,“ рече обвинетиот.
Судењето продолжи со сведочење на вработена која раководела со финансиското и шалтерското работење на клиниката. Таа изјави дека Нухи и ја одзел надлежноста за подготовка на налози кон добавувачите, а дека поранешниот директор Васев не поднесувал барања за дополнителни средства од Фондот за здравствено осигурување, што довело до акумулирање долгови.
Одбраната укажа дека сведокот има конфликт на интереси, бидејќи нејзиниот сопруг работел во веледрогерија и дека била незадоволна поради прераспоредување, што — според нив — влијаело врз нејзините искази.
„Истата колешка во истрагата изнесува субјективни тврдења за лични работи, вклучувајќи обвинувања дека Васев земал пари од пациенти или ги бирал пациентите. Тоа се лични согледувања мотивирани од лоша емоција поради нејзиното прераспоредување,“ изјави адвокатот Боби Спирковски.
Според обвинението, Васев и Нухи со незаконски набавки и присвојување лекови ја оштетиле државата за околу 36 милиони евра.
