Митева ги демантира обвинувањата за набавка на софтвер за прислушување: „СДСМ лаже, договорот е за форензички лиценци“
Владината портпаролка Марија Митева денеска остро ги демантираше тврдењата на СДСМ дека Министерството за внатрешни работи (МВР) набавува сомнителен софтвер за прислушување. Таа ги нарече изнесените обвинувања „ноторни лаги“ и обвини дека токму СДСМ е одговорен за претходната набавка на тој тип на опрема.
„Во целост ја демантирам прес-конференцијата на СДСМ. Сѐ што беше изнесено е ноторна лага. СДСМ ја набави таа форензичка опрема додека беше на власт и многу добро знае дека таа не може да функционира без годишни лиценци. Тоа што сега се набавуваат е само продолжување на тие лиценци, со рамковна спогодба за наредните три години“, изјави Митева, додавајќи дека СДСМ води политика без идеи и излегува со неосновани обвинувања.
Претходно, потпретседателот на СДСМ, Методија Илиевски, обвини дека МВР склучило договор за набавка на софтвер кој, како што рече, може да се користи за прислушување и шпионирање новинари и неистомисленици. Тој изрази загриженост дека земјата се враќа кон „режимски практики“.
Митева, во контекст на овие обвинувања, истакна дека набавката се однесува исклучиво на опрема за дигитална форензика и оти станува збор за технички и административен процес, а не за тајно следење.
Во однос на маршот што го одржаа семејствата на загинатите во пожарот во Кочани, Митева порача дека Владата ја разбира болката на блиските, но укажа дека на настанот се слушнале и, како што рече, „лични напади со политичка позадина“.
„Навистина жалам што некои политички структури продолжуваат со некрофилска традиција, користејќи трагедии за дневнополитички цели“, изјави таа.
