Митев: Ни фалат многу килограми за да се носиме со германските ѕверови!
Разликата во квалитет беше очигледен, а најголема болка одново беше нашата одбрана. Нашиот централен бек, Марко Митев, смета дека искуството стекнато со играње во Бундеслигата е непроценливо и дека носи голема предност во однос на ривалите.
„Игравме против селекција што ќе се бори за медал на ЕП и навистина не беше лесно да се носиме против толку квалитетен противник. Најголемиот дел од германските репрезентативци играат во Бундеслигата, која е најсилна на светот и искуството собрано таму е непроценливо. Сето ова наведува дека крајниот епилог и не е премногу изненадувачки“, изјави Митев.
Ракометарот на Алкалоид потоа се осврна и на разликата во маса помеѓу ракометарите на двете селекции, со оглед што Германците речиси на секоја позиција имаа 10- 20 килограми мускулна маса повеќе во однос на нашите момци.
„Не само Германците, туку речиси сите репрезентации на ЕП имаат ракометари кои важат за многу силни. Се согласувам со селекторот Лазаров за тоа што го изјави пред неколку дена дека треба повеќе да работиме на себе. Едноставно треба да ставиме многу кила за да може да се носиме со ваквите ѕверови на теренот, односно со репрезентација што е физички многу помоќна од нас“, дополни Митев.
Македонија последната шанса за барем почесен бод или победа ќе ја има задутре, кога во Берлин ќе го одигра последниот меч на континенталниот собир и тоа против селекцијата на Швајцарија.
