Мисајловски поддржува воведување на задолжителен воен рок, но вели во овој момент не е применливо

Министерот за одбрана, Владо Мисајловски, лично ја поддржува идејата за воведување на задолжителен воен рок, но смета дека во земјата во моментов не се исполнети потребните финансиски и просторни услови за негова реализација. Оваа изјава Мисајловски ја даде за време на денешната посета на велешката касарна „Алексо Демниевски-Бауман“.

Министерот истакна дека иако многу земји во регионот и Европа веќе воведуваат различни модели на воени обуки во траење од неколку месеци, Македонија се соочува со објективни пречки. Како главен проблем тој го посочи недостигот на капацитети, со оглед на тоа што со години наназад голем дел од касарните биле предадени на општините и пренаменети за други цели.

„Јас лично го охрабрувам тој потег. Мислам дека младите луѓе треба да го поминат тоа, но мора да се земат предвид повеќе параметри, пред сѐ финансиите и капацитетите. Во овој момент тоа не е применливо, но доколку во иднина воените авторитети оценат дека е потребен таков исчекор, јас сум тука да го реализирам“, изјави Мисајловски.

Поводот за посетата беше свеченото давање заклетва на 296 нови професионални војници, меѓу кои и 26 девојки, кои влегуваат во редовите на Командата за обука и доктрина. Поради високиот интерес за воената професија, министерот најави дека до крајот на годината ќе биде објавен уште еден конкурс за прием.

Дополнително, Мисајловски соопшти дека конечно е изработено решение за статусот на професионалните војници со навршени 45 години возраст. Ова решение, кое се подготвуваше во соработка со Армијата, наскоро ќе биде јавно објавено и ќе прецизира како овие лица ќе бидат соодветно згрижени по завршувањето на нивниот ангажман во активната служба.