Министерството за финансии побара 1,91 милијарди евра од 21 кредитор за изградба на брзата пруга
Министерството за финансии денеска испрати барање до 21 меѓународнa финансискa институциja и странски комерцијални банки за покажување интерес за финансирање на проектот за изградба на брза пруга долж Коридорот 10. Износот кој се бара за реализација на проектот е 1,91 милијарда евра.
Барањето е доставено до Светска банка, Европската банка за обнова и развој, Европската инвестициска банка, Фондот за меѓународен развој на ОПЕК, Француската развојна агенција, КФВ Развојната банка, Италијанската развојна банка, Јапонската агенција за меѓународна соработка, германската ДЗ Банка, Морган Стенли, Уни Кредит Банка Австрија, Сити банк, ЏП Морган, Дојче Банк, Сосиете Женерал, Рајфајзен банк, ЕРСТЕ банк, Банка ИМИ, Банка на Америка, јапонската МУФГ Банка, како и американската Голдман Сакс.
Од Министерството за финансии не споменува изработен конкретен проект, но вели дека има образложение од Министерството за транспорт и јавното претпријатие МЖ Инфраструктура за тоа зошто се бара волкава голема сума.
„Согласно испратеното барање, одговорот за пројавување интерес меѓународните финансиски институции и странските комерцијални банки треба да го достават до крајот на овој месец, со можност за продолжување на рокот по барање на банките.
Имено, Министерството за финансии го испраќа барањето за пројавување интерес со меѓународните финансиски институции врз основа на Заклучок на Владата и врз основа на законските прописи, односно Законот за јавен долг. Заедно со барањето Министерството за финансии испраќа до меѓународните финансиски институции и банките и образложение за проектот подготвено од Министерството за транспорт и врски и МЖ Инфраструктура, а кое исто така е разгледано од страна на Владата“, соопшти МФ.
Министерката Гордана Димитриоска Кочоска претходно рече дека ако државата не може да ги враќа парите,гарантор со поддршка ќе биде Обединетото Кралство.
