Мицкоски до бугарските европратеници: Повлечете ги амандманите ако навистина нема блокада!
Кога пријателството се условува, добрососедството се претвора во уцена, а историјата се користи како политичка алатка – тогаш неопходно е јасно да се постават границите. Премиерот Христијан Мицкоски недвосмислено порача дека Македонија нема да дозволи компромис кога станува збор за националниот идентитет.
Во време на засилени тензии меѓу Скопје и Софија, особено во пресрет на дебатата за извештајот за Македонија во Комисијата за надворешни работи на Европскиот парламент, Мицкоски апелираше до бугарските европратеници да ги повлечат спорните амандмани со кои се предлага македонскиот идентитет да биде означен како „сегашен“.
– Очекувам на 24 јуни, бугарските членови во Европарламентот да покажат дека зборовите им се во склад со делата. Нека ги повлечат амандманите и нека дозволат извештајот да биде усвоен во европски дух – рече Мицкоски.
Според него, инсистирањето на Софија да го условува европскиот пат на Македонија преку јазични и идентитетски формулации, претставува опасен преседан.
Од бугарска страна, претседателот Румен Радев тврди дека не станува збор за блокада, туку за „почитување на веќе постигнатите договори“, повикувајќи се на Преговарачката рамка, Договорот за добрососедство од 2017 година и билатералните протоколи. Радев од Тирана порача дека Софија не поставува нови услови, туку инсистира на целосна имплементација на постоечките.
Но, како што укажаа македонските власти, Бугарија во практика не ги почитува пресудите на Европскиот суд за човекови права кои се однесуваат на правата на Македонците во Бугарија. Дополнително, македонската заедница таму сè уште нема свој претставник во бугарскиот комитет за малцинства.
Претседателката Гордана Сиљановска – Давкова, пак, од Самитот во Тирана, порача:
– Не бараме ексклузивитет, туку европски стандарди. Сакам мојата држава да биде како секоја друга во Европа, а не исклучок.
И додека македонските институции повикуваат на европски вредности, дијалог и заемна почит, Скопје испраќа јасна порака: македонскиот идентитет не е монета за поткусурување на патот кон ЕУ.
