Министерство за транспорт: Има нови 11 свлечишта – до 31-ви декември нема да е готов автопатот Кичево-Охрид
Автопатот Кичево-Охрид нема да е готов до крајот на годината, рок кој беше даден во јуни 2021 година. Ова индиректно се разбира од испратеното соопштение од Министерството за транспорт и врски кои потенцираат дека има појава на нови 11 свлечита на трасата.
„Појавени се единесет нови свлечишта на трасата и поради тоа ќе се ангажираат меѓународни експрети кои ќе дадат предлог проектански решенија и мислење за целокупниот проект“, велат од Министерството за транспорт и врски во испратено соопштение до медиумите.
Додаваат дека во тек е ревизија од Државниот завод за ревизија во Јавното претпријатие за државни патишта во однос на финансиските извештаи и услогласеност како и ревизија за успешност на капиталните инвестиции.
„Министерството за транспорт и врски и ЈП за државни патишта, преку Надзорниот орган ангажира експрест за Фидик договори преку кој треба да се обезбеди анализа на договорот како и решенија за сите идни чекори на Владата за реализација на проектот за изградба на автопатската делница Кичево – Охрид. Ова е потребно од причина што рокот за реализација на овој инфраструктурен проект завршува на 31 декември оваа година, а до тогаш Министерството за транспорт и врски и ЈП за државни патишта преку Владата на Република Северна Македонија ќе донесат одлука со најсоодветното решение за дореализација на овој проект“, велат од МТСП.
За потсетување, изградбата на автопатот започна во 2013 година. Првично требаше да заврши во 2018 година, потоа рокот беше поместен за јуни 2021 година, а потоа до крајот на оваа година. Требаше да чини 378 милиони евра, но сумата е двојно зголемена и изнесува околу 600 милиони евра. Автопатот Кичово-Охир е дел од коридорот 8.
