Минимален раст на цените, трговците ја намалиле маржата

Цените на основните производи во земјава бележат минимален пораст, додека трговците ја намалиле својата профитна маржа со цел да се задржи стабилноста на пазарот, покажува најновата анализа на Министерството за економија и труд.

Истражувањето, изработено во соработка со Државниот пазарен инспекторат, ги опфаќа движењата на цените на 55 најпродавани прехранбени и непрехранбени производи во четири трговски синџири, во периодот од 1 февруари до 1 април 2026 година.

Според податоците, продажните цени во просек пораснале за 0,43 проценти, додека набавните цени се зголемиле за 1,01 процент. Во истиот период, просечната бруто профитна маржа кај трговците е намалена од 16,28 на 15,80 проценти, што укажува дека дел од растот на трошоците не бил префрлен врз потрошувачите.

Анализата по категории покажува различни трендови. Кај основните прехранбени производи е регистриран благ пораст од 0,45 проценти, при што најголемо зголемување има кај киселото млеко, сирењето, јајцата и маслото. За разлика од нив, безалкохолните пијалоци бележат намалување од 1,01 процент.

Пад од 0,86 проценти е забележан и кај овошјето и зеленчукот, иако дел од производите како доматите и кромидот имаат зголемени цени. Кај основните хигиенски производи, пак, е евидентиран пораст од 1,42 проценти.

Од Министерството оценуваат дека ценовните движења во овој период се умерени и под контрола, делумно и поради намалувањето на трговските маржи. Оттаму најавуваат дека ќе продолжат со редовно следење на состојбите на пазарот и, доколку има потреба, ќе предложат мерки за дополнителна стабилизација на цените.