Милионска измама со превоз на ученици во Тетово: Со истечени договори и лажни искази кај нотар барале наплата на 17 милиони денари
Секторот за внатрешни работи (СВР) Тетово поднесе кривични пријави против двајца превозници и нивните фирми, кои се обиделе на незаконски начин да наплатат огромни суми пари од средни училишта во градот. Иако договорите за превоз им биле истечени, тие изготвувале фактури и преку нотари се обиделе да изнудат наплата, тежејќи го буџетот за вкупно над 17 милиони денари.
Полицијата ги товари за кривичните дела „измама“ и „давање лажен исказ“.
Во првиот и потежок случај, кривична пријава е поднесена против М.З. (46) од Тетово и неговото транспортно претпријатие.
Според истрагата, иако знаеле дека договорот за превоз на редовни ученици со средното училиште е веќе истечен, тие за месеците септември и октомври 2024 година изготвиле фактури во вредност од дури 15.034.110 денари. Откако училишните служби ја одбиле наплатата и не наседнале на измамата, осомничените отишле чекор понатаму – дале лажен исказ пред нотар. Врз основа на тој исказ, успеале да издејствуваат предлог-решение за нотарски платен налог.
Во вториот одвоен настан, пријавен е Ќ.Ф. (59) од село Шемшово и неговото правно лице.
Слично на претходниот случај, иако договорот бил истечен, тие на 10 јуни 2025 година (ретроактивно) изготвиле фактури за септември и октомври 2024 година во вкупен износ од 2.152.447 денари. Со намера да го доведат училиштето во заблуда, ги доставиле фактурите за наплата. Кога тоа не поминало, исто така побарале правна заштита преку нотар со давање лажен исказ, барајќи издавање на нотарски платен налог за непостоечкиот долг.
