Милановиќ: Македонија не смее да биде жртва на уцени за членство во ЕУ
Хрватскиот претседател Зоран Милановиќ, на заедничка прес-конференција со претседателката Гордана Сиљановска Давкова во Вила Водно, испрати јасна порака – Македонија не треба да трпи никакви уцени или изнудувања во процесот на пристапување кон Европската Унија.
„Државата не смее да дозволи да биде жртва на политички притисоци. Ќе добиете многу совети – од соседите, од меѓународната дипломатија, од самата ЕУ – но не се сите паметни ниту корисни. Само вие можете да одлучите што е најважно за вашата држава,“ нагласи Милановиќ.
Тој посочи дека не сака да полемизира, ниту директно да ги коментира ставовите на Бугарија, но подвлече дека во ЕУ потребен е консензус, и дека додека некоја земја се спротивставува, Македонија не може да напредува на тој пат.
„Прашањето е – дали ЕУ е сѐ уште ваша примарна цел? Или можеби постојат други патишта кон успех и развој? Тоа е одлука што самите треба да ја донесете,“ рече Милановиќ.
Претседателот на Хрватска додаде дека Македонија не смее да се третира како „посебен случај“ и оти постоечките проблеми произлегуваат од несогласувања со други страни, а не од нејзина вина.
„Не смееме да ја гледаме Македонија како држава со посебни потреби. Европското право и принципите се важни, но реалноста покажува дека ЕУ не секогаш функционира според тие правила. Сепак, има и добри страни – само не смееме да живееме во илузии,“ предупреди тој.
Во врска со договорот за воена соработка помеѓу Хрватска, Албанија и Косово, Милановиќ објасни дека станува збор за меморандум, а не формален договор, и дека истиот не треба да предизвикува тензии.
„Тоа е меморандум што го потпишаа министрите за одбрана на три пријателски држави. Поддржувам ваква соработка и сакам да ги смирам соседните држави, како Србија – нема простор за страв или сомнеж,“ изјави Милановиќ.
