Мицкоски запали свеќа и оддаде почит на децата кои го загубија животот во „Пулс“ во Кочани
Премиерот Христијан Мицкоски денес беше во Кочани, каде што во тивка и скромна атмосфера оддаде почит на децата кои го загубија животот во трагичниот пожар на 16 март. Тој посети дел од гробовите на младите жртви и запали свеќи во нивна чест.
За време на престојот, Мицкоски се сретна и со родители на загинатите. Меѓу нив беше и Тошо Антов, кој на социјалните мрежи сподели дека посетата на премиерот ја доживеал како чин на човечност и почит.
„Само тивок и достоинствен чин. За нас родителите, секој што ќе застане со почит пред нашата болка е пред сè човек. Денес така го доживеав и премиерот – како човек. Ве молам, не ја злоупотребувајте оваа болка за политика. Гестот беше човечки и тоа е доволно“, напиша Антов.
Посетата на премиерот и реакцијата на семејствата отворија прашање за чувствителниот однос кон трагедиите во општеството. Пораката што произлезе од Кочани е дека најтешката болка треба да остане надвор од политичките пресметки.
