Мицкоски за загадувањето од Дрисла: МВР ќе интервенира таму, сите виновници ќе одговараат!

Премиерот Христијан Мицкоски денеска го коментираше проблемот со ЈП „Дрисла“, од каде веќе неколку дена се шири густ чад, предизвикувајќи високо ниво на загаденост во Скопје.

Тој изјави дека Владата и надлежните институции преземаат мерки за решавање на ситуацијата, а од денеска во депонијата ќе интервенира и полицијата.

„Како Влада и институции ги преземаме сите потребни мерки. За дивата депонија Вардариште веќе има приведени лица, кои ја користеле илегалната депонија за производство на метали и нивна понатамошна нелегална продажба. Таму е ангажирано приватно обезбедување, обезбедена е градежна механизација и ситуацијата е под контрола. Останува Дрисла“, рече Мицкоски.

Тој додаде дека, иако Дрисла беше санирана вчера, пожарот повторно се активирал пред крајот на ноќта. „Денеска таму ќе интервенира МВР, а ние сме во контакт со Дирекцијата за заштита и спасување. Очекувам проблемот да биде решен. Сочувствувам со граѓаните кои го чувствуваат чадот, но е чудно како вакви настани се случуваат во јавни претпријатија каде има свои кадри од одредени политички партии. Ќе ги истражиме причините и ќе обезбедиме докази, а сите виновници ќе одговараат пред правдата“, додаде Мицкоски.