МИЦКОСКИ ЗА ВЕНЕЦУЕЛА: „Стоиме зад САД – каде беа „експертите“ кога меѓународното право се кршеше врз грбот на Македонија?“
„Апсолутно стоиме до аргументите и потезите на нашиот стратешки партнер САД“. Ова е децидниот одговор на премиерот Христијан Мицкоски во врска со воената операција за апсење на венецуелскиот претседател Николас Мадуро.
Запрашан дали ваквиот чин е во согласност со меѓународното право и Повелбата на ОН, Мицкоски не само што ја поддржа акцијата, туку и остро реагираше на, како што рече, лицемерието на меѓународната заедница кога станува збор за Македонија.
Премиерот истакна дека го загрижува двојниот аршин на оние што сега критикуваат, а молчеле кога неправдите се случувале врз македонскиот народ.
Тој потсети на пресудата од Хаг која беше игнорирана, како и на промените на знамето и Уставот.
На новинарското прашање дали ова е преседан кој може да се повтори и на други места, вклучително и Македонија, Мицкоски одговори дека земјава веќе ги искусила најтешките преседани.
Тој додаде дека кога еднаш ќе се направи исклучок, тој станува пракса која порано или подоцна удира по грбот на тие што молчеле.
Со оваа изјава, Владата се приклучува кон ставот на МНР, кое претходно ја поздрави операцијата во која, со учество на над 150 авиони, американските сили го приведоа Мадуро и неговата сопруга во Каракас.
