Мицкоски: Во јуни камен-темелник на „Алказар“
Премиерот Христијан Мицкоски денеска пред медиумите рече дека големиот ветерен парк на „Алказар“ ќе започне да се гради во јуни како прва странска инвестиција што ја најави новата власт.
– Во јуни за Алказар ставаме камен темелник, тоа е инвестиција од половина милијарда американски долари, со што ќе имаме повеќе електрична енергија произведена отколку што трошиме, рече Мицкоски додека присуствуваше на настан во Илинден.
Минатата година на презентација пред јавноста беше најавен ветерен парк што ќе произведува еден терават електрична енергија. Ветерниот парк, како што беше посочено на промоцијата на инвестицијата, ќе има 55 ветерници и ќе се гради меѓу три општини Карбинци, Штип и Радовиш.
Електричната енергија што ќе се произведува од овие ветерници е приближно 20 отсто од целокупното производство на електрична енергија во земјава. Во текот на изградбата на ветерниот парк се очекува да бидат отворени 630 нови работни места.
