Мицкоски со осуда за случајот со новинарката Лиридона – ваквата одлука претставува ограничување на слободата на говорот на новинарите
Новинарката од Тетово, Лиридона Весели, е осудена на парична казна од 700 евра поради тоа што во свое новинарско известување го спомнала името на судија, со образложение дека на тој начин му бил нарушен интегритетот.
Судската одлука се однесува на нејзиното известување на социјалните мрежи, во кое Весели го навела името на судијата Нази Филјази, кој донел судска одлука за предмет што новинарката го следела подолг временски период. Според пресудата, објавувањето на името и презимето на судијата било оценето како злоупотреба на лични податоци и повреда на неговиот интегритет, иако станува збор за носител на јавна функција и судски предмет од јавен интерес.
Весели оценува дека станува збор за преседан во македонското правосудство и сериозно нарушување на слободата на медиумите. Таа посочува дека била казнета само затоа што известувала за судска одлука на судија од Основниот суд во Тетово, кој укинал притвор и изрекол казна од три месеци затвор за случај што вклучувал малолетна жртва. Паричната казна од 700 евра ѝ ја изрекол Основниот суд во Гостивар.
Случајот го осуди и премиерот Христијан Мицкоски, кој оцени дека ваквата одлука претставува ограничување на слободата на говорот на новинарите. Тој истакна дека слободата на изразување е над сè и дека секој напад врз новинар, без разлика дали доаѓа од политичка фигура, јавна личност или судија, треба најостро да се осуди.
Реакција пристигна и од Здружението на новинари, од каде што посочија дека името и презимето на судија се јавен податок и дека е апсурдно неговото објавување да се третира како повреда на правото на приватност. Според Здружението, првостепената пресуда испраќа сериозно негативен сигнал за слободата на изразување во земјава и дополнително го зголемува притисокот врз новинарството и правото на јавноста да биде информирана.
Со реакција се огласи и Агенцијата за аудио и аудиовизуелни медиумски услуги, оценувајќи дека кривичното гонење на новинари за објавување податоци за носители на јавни функции, во контекст на нивната професионална работа, создава притисок врз медиумите и ги ограничува медиумските слободи. Од Агенцијата апелираат сите релевантни чинители активно да придонесат кон заштита на слободата на изразување и информирање, како и кон обезбедување сигурна средина за работа на новинарите.
Инаку, според Кодексот на новинари и новинарските стандарди, дозволено е објавување на имиња на јавни личности, особено кога станува збор за теми од јавен интерес. Судските пресуди се јавни, како и имињата на судиите кои ги носат, а тие податоци се достапни за сите граѓани, не само за новинарите.
