Мицкоски со честитка за Денот на Европа: Да не заборавиме на огромната жртва која како народ ја дадовме во борбата против фашизмот
Премиерот Христијан Мицкоски денеска упати честитка по повод 9-ти мај – Денот на Европа.
„Денес го славиме мирот, единството и заедничките вредности што не обединуваат како европски народи.
Нека ни биде потсетник дека преку дијалог, солидарност и почит кон различноста можеме да градиме подобра иднина за сите.
За Македонија, Денот на Европа не е само симболика, тој е и поттик за уште посилна посветеност кон европските вредности, реформи и напредок.
Нашиот пат кон Европската унија е пат на достоинство, работа и надеж.
Македонија припаѓа во Европа, со својот идентитет, култура и визија за иднината!
Обединети во различноста, силни во заедништвото.
Но воедно да не заборавиме на огромната жртва која како народ ја дадовме во борбата против фашизмот. Победата над фашизмот беше резултат и на блескавата саможртва на илјадници македонски партизани кои во своите животи ги положија за денешната слобода и беа наследници на илинденскиот пламен за Македонија.
Методија Андонов Ченто, Петре Пирузе Мајски, Михајло Апостолски, Павел Шатев, Мирче Ацев, Орце Николов, Страшо Пинџур, Христијан Тодоровски – Карпош, Ибе Паликуќа, Елпида Караманди, Кузман Јосифовски – Питу и плејада други големи имиња се вградија во денешната наша државност.
Пред нивното дело се поклонуваме со огромна почит и внимание. Затоа победата над фашимот е и наше право, а почитта кон тоа е наш долг. Честит 9 мај“, пишува Мицкоски.
