Мицкоски: Подобро на краток рок да ја платиме политичката цена, отколку граѓаните да ја плаќаат на долг
Владата подготвува пакет мерки за зауздување на инфлацијата – чекори кои, според премиерот Христијан Мицкоски, краткорочно ќе бидат болни за граѓаните, но на долг рок ќе придонесат за стабилизирање на цените. Тој призна дека мерките ќе имаат политичка цена за Владата, но смета дека е подобро таа да се плати сега, отколку граѓаните да трпат со години.
„Свесни сме каде е проблемот и дека тоа ќе има политичка цена, но подобро е краткорочно да ја платиме ние, отколку граѓаните да ја плаќаат постојано на долг рок,“ изјави Мицкоски.
Економските експерти предупредуваат дека мерките за борба против инфлацијата не треба да вклучуваат замрзнување на цените и маржите, бидејќи тоа предизвикува таканаречен „јо-јо“ ефект – по привремено намалување, цените се враќаат на претходното ниво или се зголемуваат.
Дел од економистите со кои разговара ТВ21 објаснуваат дека јулската инфлација од 4,8% годишно не е поттикната од цените на храната, туку од други фактори, како растот на базичната инфлација во која спаѓаат услугите (транспорт, угостителство, туризам), а храната и енергенсите се исклучени.
Вчера, премиерот истакна дека зголемувањето на платите и пензиите е еден од факторите за раст на инфлацијата. СДСМ го оспори ова тврдење.
„Цените растат затоа што нема стратегија за економска стабилност, затоа што се толерираат монополи и шпекулативни маржи, и затоа што зависиме од увоз за основни добра. Обидот да се префрли вината врз работниците и пензионерите е политички срамен,“ изјави Фатмир Битиќи од СДСМ.
Од Институтот за економски истражувања и политики „Фајнанс Тинк“ пак сметаат дека повисоките плати и пензии ја зголемиле личната потрошувачка, што исто така придонесува за зголемување на инфлацијата.
