Мицкоски: Платите во администрацијата ќе пораснат за 40% во следните две години
Премиерот Христијан Мицкоски во своето гостување на МРТВ информираше за текот на преговорите со репрезентативните синдикати во врска со покачувањето на платите во јавниот сектор. По денешниот состанок со УПОЗ, премиерот ја образложи понудата на Владата која треба да обезбеди континуиран раст на примањата на административните службеници.
Понудата предвидува етапно зголемување на платите, кое ќе започне со исплатата во април (за мартовската плата) оваа година. Моделот вклучува 8% зголемување на збирот од сегашната плата, претходно нивелирана со минималната плата. Истиот модел би се реплицирал и во 2027 и во 2028 година.
„За отприлика две години и три месеци од денеска, административните службеници кои не добиле зголемување во минатото, ќе имаат минимално 40% поголема плата споредено со денешното ниво“, истакна Мицкоски.
Премиерот појасни дека синдикатите моментално се консултираат со своите раководства за понудените услови. Доколку се постигне согласност во текот на наредните два дена, во недела би требало да се финализира договорот.
Од понеделник би започнала подготовката на примероците за индивидуалните синдикални договори по работни единици, со што ќе се отвори патот за реализација на ветеното покачување. Мицкоски нагласи дека Владата води инклузивен дијалог со двата репрезентативни синдикати (ССМ и КСС) за да се осигураат правата на сите работници во администрацијата.
