Мицкоски најави можно намалување на цените на горивата
Можно е ново намалување на цените на горивата во земјава, откако надлежните најавија дека на следната седница ќе се разгледува корекција на ценовникот во согласност со движењата на светските пазари.
Премиерот Христијан Мицкоски информираше дека се очекува Регулаторна комисија за енергетика да донесе одлука со која дизелот би поевтинил за 2,5 денари по литар, додека бензините Еуросупер 95 и Еуросупер 98 би се намалиле за 1,5 денари.
Според најавите, максималната цена на Еуросупер 95 би изнесувала 82 денари за литар, Еуросупер 98 – 84 денари, додека дизелот би се продавал по 95,5 денари за литар. Овие цени не ги вклучуваат дополнителните попусти што ги нуди ОКТА, кои изнесуваат 2 денари за бензините и 3 денари за дизелот.
Како што беше посочено, очекуваната одлука се темели на анализите на движењата на цените на суровата нафта и нафтените деривати на светските берзи во изминатиот период.
Воедно, Владата најавува дека и понатаму ќе продолжат мерките за ублажување на ценовните шокови, вклучително и намалениот ДДВ за горивата од 18 на 10 проценти, како и механизмите за усогласување на акцизите.
Од властите уверуваат дека снабдувањето со нафта и нафтени деривати останува стабилно и дека ќе бидат обезбедени доволни количини за потребите на граѓаните и стопанството.
