МИЦКОСКИ: Македонската јавност треба да знае како се манипулирало при пресметката на минималната потрошувачка кошничка
Премиерот Христијан Мицкоски вели дека има пропусти во методологијата како се пресметува кошничката.
„Македонската јавност треба да знае како се манипулирало при пресметката на минималната потрошувачка кошничка, а ја пресметувале поранешни функционери од СДСМ“, кажа Мицкоски одговарајќи на пратеничко прашање на екс министерката за труд и социјална политика Јована Тренчевска денеска во Собранието.
Мицкоски истакна дека Владата има и покажала разбирање за граѓанските иницијативи за бојкот на маркетите, а потоа ја коментираше методологијата за пресметување на кошничката.
„Дали ја видовте методологијата како се пресметува минималната кошничка? Јас во мојот живот во јануари цреши и лубеници не сум јадел. Е, тоа е дел од методологијата, која е со цени од маркети кои во јавноста важат за ексклузивни маркети, наместо да се пресмета просечната цена. А, ја пресметуваат тројца експерти, Никола Поповски, Драган Тевдовски и Бранимир Јовановиќ. Појдов во неколку маркети без обезбедување и неколку производи од потрошувачката кошница ги споредив со цените. Само за храна и пијалаци цената е помала за 3.000 денари од предвидена цена, што ќе рече за 15 отсто помала. Просечната цена. Јас самиот сум го направил тоа“, истакна премиерот.
Тој рече дека ова со слики ќе го презентира во понеделник. Минималната кошничка за четири члена одамна е над 1.000 евра.
Граѓаните утре ќе ги бојкотираат маркетите, револтирани поради високите цени.
